Tramp Signal messenjeri chatidagi ma’lumot sizib chiqishi tufayli hech kimni ishdan bo‘shatmasligini ma’lum qildi

"Men odamlarni soxta yangiliklar sababli ishdan bo‘shatmayman", — deya ta’kidladi AQSh prezidenti NBC News telekanaliga bergan intervyusida.

Tramp milliy xavfsizlik bo‘yicha maslahatchisi Mayk Uols va Pentagon rahbari Pit Hegsetga ishonishini bildirdi. Shuningdek, u Uolsni ishdan bo‘shatish haqida hech qachon gap-so‘z eshitmaganini aytib, bunday qarorni faqat o‘zi qabul qilishi mumkinligini qo‘shimcha qildi.

Avvalroq The Atlantic nashri bosh muharriri Signal messenjeridagi guruh chatiga qo‘shilgani va unda Tramp ma’muriyati amaldorlari Yamandagi husiylar pozisiyalariga zarba berishni muhokama qilganini ma’lum qildi. Chatda 18 kishi bo‘lib, ular orasida AQSh mudofaa vaziri Pit Hegset, prezidentning Yaqin Sharq bo‘yicha maxsus vakil Stiv Uitkoff, milliy xavfsizlik bo‘yicha maslahatchi Mayk Uols hamda ichki xavfsizlik bo‘yicha maslahatchi Stiven Miller bor edi.