Tramp noyabrda Kim Chen In bilan uchrashmoqchi

AQSh prezidenti Donald Tramp Osiyoga keyingi safari davomida Shimoliy Koreya yetakchisi Kim Chen In bilan uchrashishni ko‘rib chiqmoqda. Bu haqda The Wall Street Journal (WSJ) manbalarga tayanib xabar berdi. ​Nashrning xabar berishicha, Amerika prezidenti noyabr oyida Osiyo-Tinch okeani iqtisodiy hamkorligi (APEC) sammiti bo‘lib o‘tadigan Shenchjenda muzokaralar o‘tkazishni rejalashtirmoqda. ​WSJ ta’kidlashicha, Tramp Shimoliy Koreyani yadrosizlantirish bo‘yicha diplomatik tashabbusni yangilashga umid qilmoqda. Manbalarga ko‘ra, AQSh prezidenti Eron bilan mojaroni hal qilishda siljish yo‘qligi sababli tashqi siyosatda katta yutuqlarga erishmoqchi. ​Tahlilchilar Donald Tramp va Kim Chen In o‘rtasidagi mumkin bo‘lgan sammitning samaradorligiga shubha bilan qarashmoqda. Ularning so‘zlariga ko‘ra, Shimoliy Koreyaning yadroviy arsenali avvalgi uchrashuvlaridan beri faqat kuchaygan.