Tramp: G‘azodagi urush Isroilga zarar yetkazmoqda

AQSh prezidenti Isroilning jamoatchilik fikri maydonida yutqazganini tan oldi va Netanyaxuni urushni tugatishga chaqirdi.

AQSh prezidenti Donald Tramp ta’kidlashicha, Isroil G‘azodagi urushda, ehtimol, harbiy jihatdan yutyapti, biroq jamoatchilik fikrida yutqazmoqda. U bu fikrni Daily Caller nashriga bergan intervyusida aytdi. Ushbu tezis Trampning o‘tgan yilgi saylovoldi kampaniyasida eshitilgan edi, lekin u yanvarda Oq uyga qaytganidan beri bu haqda ochiq gapirmagan.

«Ular bu urushni tugatishlari kerak... Bu Isroilga zarar keltiryapti», — dedi Tramp va u G‘azo shahrini okkupasiya qilish rejasini qo‘llab-quvvatlashini ta’kidladi.

🇺🇸 AQShda, jumladan, Respublikachilar partiyasi ichida ham Isroilga nisbatan qo‘llab-quvvatlash pasayib borayotgani haqidagi savolga Tramp: «Men bu haqda bilaman», — deb javob berdi. U 15–20 yil oldin Isroilning Kongressda eng kuchli lobbisi bo‘lganini, hatto u yerdagi nazoratni to‘liq o‘z qo‘lida ushlaganini qayd etdi, biroq hozirgi vaziyat keskin o‘zgarganini aytdi.

«Bor vaqtlarda agar siz siyosatchi bo‘lishni istasangiz, Isroil haqida yomon so‘z aytishingiz mumkin emasdi. [...] Ularning lobbisi men ko‘rganlar ichida eng kuchlisi edi... Ular Kongressni to‘liq nazorat qilardi», — dedi u.

2024 yil aprel oyida ham Donald Tramp Isroilning G‘azodagi urush olib borish uslubini tanqid qilgan va uning piar (PR) sohasida yutqazayotganini ta’kidlagan edi. U urushni tezda tugatish va tinchlikka qaytishni taklif qilgan.

Shuningdek, u Isroil tomonidan e’lon qilingan G‘azodagi vayrona va qurbonliklar aks etgan kadrlar haqida shunday degan:

«Bu tasvirlar eng g‘amgin, eng dahshatli kadrlar. Menimcha, ularni (Isroilni) kuchli ko‘rsatmaydi. Ular piar urushda yutqazmoqda. Juda katta yutqazmoqda».