Huquqni muhofaza qiluvchi organlar xodimlari tomonidan joylarda giyohvandlik vositalarining noqonuniy aylanmasiga qarshi tezkor tadbirlar o‘tkazildi.
Toshkent—Farg‘ona yo‘nalishida harakatlangan, Qo‘qon shahrida yashovchi, 1997 yilda tug‘ilgan fuqaro boshqaruvidagi Lacetti avtomashinasi Ohangaron shahri hududida to‘xtatildi. Mashina xolislar ishtirokida ko‘zdan kechirilganda uning salon qismida 4 kg 986 gramm gashish moddasi borligi aniqlanib, prosessual tartibda rasmiylashtirib olindi.
Shuningdek, mazkur avtomashinaning ortidan Malibu avtomashinasida kuzatib kelayotgan uning 1987 yilda tug‘ilgan, muqaddam sudlangan akasi ham ushlandi.
Aniqlanishicha, ular Toshkent viloyatining Pskent tumani hududiga keltirib berish sharti bilan tojikistonlik narkosavdogardan 30 ming dollar evaziga sotib olingan ushbu giyohvandlik vositasini kelgusida Qo‘qon shahrida qayta sotib, mo‘may daromad topishni rejalashtirishgan.
Farg‘ona shahrida o‘tkazilgan tezkor tadbirda Farg‘ona tumanida yashovchi, 1972 yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan shaxs to‘xtatilib ko‘zdan kechirilganda, uning yonida bo‘lgan o‘yinchoq quti ichida 987 gramm gashish moddasi borligi aniqlanib, prosessual tartibda rasmiylashtirib olindi.
U mazkur ajal og‘usini Marg‘ilon shahrida yashovchi, 1984 yilda tug‘ilgan fuqarodan olgani aniqlanib, ushbu shaxs ham prosessual tartibda ushlandi hamda unga tegishli Cobalt salonidan 941 gramm opiy va 1 kg 980 gramm gashish moddalari olindi.
Tergovga qadar tekshiruv davomida, ushbu giyohvandlik vositalari muqaddam Tojikiston fuqarosi tomonidan kontrabanda yo‘li bilan olib kelingani ma’lum bo‘ldi.
Xorazm viloyatining Urganch shahrida kuzatilgan holatda esa, Surxondaryo viloyatining Oltinsoy tumanida yashovchi, 1981 yilda tug‘ilgan fuqaro Tojikistondan keltirilgan 501 gramm opiy va 459 gramm gashish moddalarini 7800 dollarga sotishga kelishib, oldindan 3 ming dollar olgan vaqtida ushlandi.
Toshkent shahrining Yangihayot tumanida o‘tkazilgan tezkor tadbirda, Yashnobod tumanida yashovchi, 1982 yilda tug‘ilgan, muqaddam giyohvandlik vositalari bilan bog‘liq jinoyati uchun sudlangan shaxs to‘xtatilib tekshirilganda, unga tegishli ish qurollari uchun mo‘ljallangan chamadonda 297 gramm gashish va 9 gramm opiy moddalari borligi aniqlanib, prosessual tartibda rasmiylashtirib olindi.
Qozog‘iston Rossiya, Xitoy, Turkiya va Markaziy Osiyo davlatlarini ortda qoldirdi
O‘zbekistonda hafta boshida kutilayotgan ob-havo ma’lum qilindi
Ukraina dushman uchun «Jahannam» tayyorladi
