Tanzila Norboyeva muftiy Usmonxon Alimov vafoti munosabati bilan ta’ziya bildirdi

Senat raisi Tanzila Norboyeva muftiy Usmonxon Alimov vafoti munosabati bilan uning yaqinlari va oila a’zolariga ta’ziya bildirdi. Buni u o‘z Telegram kanalida ma’lum qildi.

Unda aytilishicha, Tanzila Norboyeva O‘zbekiston Musulmonlari idorasi raisi, muftiy Usmonxon Temirxon o‘g‘li Alimovning vafoti munosabati bilan yaqinlari va oila a’zolariga chuqur hamdardlik bildirgan. Marhum nafaqat O‘zbekiston, balki dunyo miqyosidagi obro‘-e’tiborli ulamolardan biri bo‘lganini ta’kidlagan.

«Muftiy hazratlarining dinimiz rivojiga, shu bilan birga ilm-ma’rifat, ziyo taratishda hamda yurtimizda ziyoratgohlar, madrasa masjidlarning qad ko‘tarishidagi xizmatlari beqiyosdir», — deb yozgan u Telegram kanalida e’lon qilingan postida.