Suriyaning iqtisodiyot vaziri butun dunyo davlatlarini respublikani tiklashda yordam berishga chaqirmoqda

Suriyaning yangi hukumatidagi Iqtisodiyot vaziri Nidal al-Shaar xalqaro hamjamiyatni respublikani tiklashda yordam berishga chaqirdi.

Vazirning nutqi Al Hadath telekanali tomonidan namoyish etilgan.

Al-Shaarning so‘zlariga ko‘ra, mamlakat hukumati endi iqtisodiyotni yanada mustahkam asosda tiklash imkoniyatiga ega. Ular ishlab chiqarishni kuchaytirish, kichik va o‘rta biznesni qo‘llab-quvvatlash, xorijiy sarmoyalarni jalb etishga e’tibor qaratish niyatida.

“Biz xalqaro hamjamiyatni avvalgi tuzum tomonidan vayron qilingan narsalarni tiklash jarayoniga hissa qo‘shishga chaqiramiz”, — dedi vazir.

Uning qo‘shimcha qilishicha, hukumat investisiya muhitini xavfsizroq va jozibador qilish uchun respublikada yangi ish o‘rinlari yaratib, shaffoflikni oshiradi.