Slovakiya Yevropa Ittifoqining Rossiya gazidan voz kechish qaroriga qarshi chiqdi

Slovakiya Rossiya gaz importini bosqichma-bosqich to‘xtatish to‘g‘risidagi Yevropa Ittifoqining reglamentiga qarshi ovoz berdi.

Slovakiya Tashqi ishlar vazirligi bu haqda ijtimoiy tarmoqlarda e’lon qildi.

"Slovakiya Rossiya gaz importini bosqichma-bosqich to‘xtatish to‘g‘risidagi Yevropa Ittifoqining REPowerEU reglamentiga qarshi ovoz berdi. Bryusselda bo‘lib o‘tgan Umumiy ishlar kengashi yig‘ilishida Davlat kotibi Marek Estosh Slovakiya nomidan reglamentga qarshi ovoz berdi va mamlakatning asosiy e’tirozlarini bildirdi", deyiladi bayonotda.

Vazirlik shuningdek, Slovakiya tashqi ishlar vaziri Yuray Blanarning Bratislava alohida a’zo davlatlarning real imkoniyatlari va o‘ziga xos sharoitlarini hisobga olmaydigan qarorlarni qabul qila olmasligini aytganini keltirdi. Uning ta’kidlashicha, bunday qarorlar barcha Yevropa Ittifoqi mamlakatlari uchun adolatli, real va ijtimoiy barqaror o‘tishni ta’minlamaydi.

Shuni hisobga olgan holda, Slovakiya Yevropa Ittifoqi Adliya sudiga murojaat qilish va reglamentni bekor qilishga qaratilgan sud jarayonini boshlash niyatida.

Shuni ta’kidlash kerakki, bugungi kunda Yevropa Ittifoqining 27 ta a’zo davlati 2027 yil oxiriga qadar Rossiyadan suyultirilgan tabiiy gaz importini bosqichma-bosqich to‘xtatish to‘g‘risidagi reglamentni rasman qabul qildi.