Senat Venesuelaga qarshi Kongress ruxsatisiz kuch ishlatmaslik to‘g‘risidagi rezolyusiyani rad etdi

AQSh Senati Prezident Donald Tramp ma’muriyatidan qonunchilik roziligisiz Venesuelaga qarshi harbiy kuch ishlatmaslikni talab qiluvchi rezolyusiyani blokladi.

Kongress yuqori palatasidagi ovoz berish C-SPAN telekanalida efirga uzatildi.

Rezolyusiyani 50 nafar qonun chiqaruvchi qo‘llab-quvvatladi, shuncha odam esa qarshi ovoz berdi. Yuqori palata teng bo‘linganligi sababli, AQSh vise-prezidenti Djey Di Vens ovoz berish huquqidan foydalandi. AQSh Konstitusiyasiga ko‘ra, u Senatga raislik qiladi.

Qo‘shma rezolyusiya senatorlar Tim Keyn (Virjiniya shtatidan demokrat), Rend Pol (Kentukki shtatidan respublikachi) va Adam Shiff (Kaliforniya shtatidan demokrat), shuningdek, Senat ozchiliklar yetakchisi Chak Shumer (Nyu-York shtatidan demokrat) tomonidan qo‘llab-quvvatlandi. Uning maqsadi AQSh harbiylarining "Kongress tomonidan tasdiqlanmaguncha Venesuelada yoki unga qarshi harbiy harakatlarda" ishtirok etishining oldini olish edi. Rezolyusiyada Qo‘shma Shtatlarda faqat qonun chiqaruvchi organ urush e’lon qilish vakolatiga ega ekanligi ta’kidlangan.

"Kongress Venesuelaga yoki Venesuelada biron bir shaxs yoki tashkilotga qarshi urush e’lon qilmagan, shuningdek, Venesuelada yoki unga qarshi harbiy kuch ishlatishga ruxsat bermagan", deyiladi matnda.