Senat O‘zbekistonda islomiy bank faoliyatini joriy etishga qaratilgan qonunni ma’qulladi

Oliy Majlis Senatining yalpi majlisida O‘zbekistonda islomiy bank faoliyatini joriy etishga qaratilgan qonun loyihasi muhokama qilindi.

Qonunga muvofiq:
➖ islomiy bank faoliyatini amalga oshirish uchun alohida lisenziya turi joriy etiladi;
➖ banklarga to‘liq islomiy bank sifatida yoki an’anaviy va islomiy bank xizmatlarini birgalikda ko‘rsatish imkoniyati beriladi;
➖ Markaziy bank va tegishli banklarda Islomiy moliya kengashlari tashkil etiladi;
➖ Soliq kodeksiga islomiy moliya operasiyalari bo‘yicha alohida soliq tartibi kiritiladi, ayrim operasiyalar QQSdan ozod etiladi.

Senatorlar fikricha, ushbu qonun moliyaviy xizmatlar qamrovini kengaytiradi, raqobat muhitini yaxshilaydi va bank-moliya sohasiga yangi strategik investorlarni jalb etishga xizmat qiladi.

Mazkur Qonun bilan 2 ta kodeks hamda 7 ta qonunga islomiy bank faoliyatini amalga oshirishning huquqiy asoslarini belgilovchi yangi normalar bilan to‘ldiriladi.

Muhokama yakunlariga ko‘ra, qonun ma’qullandi. Endilikda imzolash uchun Prezidentga kiritiladi.