Qrimda keng ko‘lamli blekaut

Yarim orol bo‘ylab shaharlar elektr ta’minotisiz qoldi, deb yozmoqda DW.

Ukraina Qurolli Kuchlari hujumlaridan so‘ng Qrimda elektr energiyasining ommaviy uzilishi sodir bo‘ldi.

"Interfaks" agentligining "Krimenergo" ishonch telefoniga tayanib yozishicha, bunga tashqi ta’sir oqibatida yuqori kuchlanishli tarmoqlarda yuzaga kelgan texnologik nosozliklar sabab bo‘lgan.

Kompaniya ma’lumotlariga ko‘ra, yarim orolning barcha shahar va tumanlaridagi iste’molchilar vaqtincha elektr ta’minotisiz qolgan. Mutaxassislar elektr uzatishni tiklash ustida ishlamoqda.

Avvalroq Sevastopolda elektr ta’minotida uzilishlar kuzatilgani xabar qilingan edi. Mahalliy hokimiyat ma’lumotlariga ko‘ra, o‘tgan tunda shahar tashqarisidagi energetika infratuzilmasiga berilgan zarba oqibatida shahar vaqtincha elektrsiz qolgan. Ertalab kontakt tarmog‘ida kuchlanish yo‘qligi sababli trolleybuslar qatnovi to‘xtatilgan edi.

Keyinroq rasmiylar aksariyat turar joylarni elektr bilan ta’minlash tiklanganini ma’lum qildi. Qolgan iste’molchilar zaxira elektr ta’minoti sxemalaridan foydalangan holda bosqichma-bosqich tarmoqqa ulanmoqda, deyiladi xabarda.