Qirg‘iziston Falastinga o‘z elchisini tayinlamoqchi

Qirg‘iziston Falastinda o‘z diplomatini tayinlash imkoniyatini ko‘rib chiqmoqda. Bosh vazir o‘rinbosari Edil Baysalov Turkiyaning TRT World nashriga bergan intervyusida hukumatning ushbu rejalari haqida ma’lum qildi.

Baysalov Qirg‘izistonning xalqaro maydondagi gumanitar roli haqidagi savolga, jumladan G‘azo mojarosida Falastinni qo‘llab-quvvatlash chaqiriqlari nuqtai nazaridan javob berar ekan, Qirg‘iziston Falastinga yordam berishda davom etayotganini va Falastinga elchi tayinlashi mumkinligini ta’kidladi.

Bundan avvalroq, ya’ni 2023 yil avgust oyida Falastin tashqi ishlar vaziri Riyoz Al-Malikiy Bishkekka tashrif buyurib, u yerda qirg‘izistonlik hamkasbi bilan tadbirlar o‘tkazgan edi. Natijada bir qancha kelishuvlar imzolanib, Qirg‘izistonda Falastin missiyasini ochish masalasi ham muhokama qilingan edi.