Qirg‘iz ayollari 10 tagacha bola tug‘ishga da’vat etilmoqda

Qirg‘iziston Milliy xavfsizlik davlat qo‘mitasi (MXQ) rahbari Qamchibek Tashiyev Norin shahridagi yangi bolalar bog‘chasining ochilish marosimida mamlakat ayollarini yana ko‘proq farzand dunyoga keltirishga chaqirdi.
Tashiyevning fikricha, ko‘p bolali oilalar mamlakat kelajagi asosidir. Uning qayd etishicha, qirg‘iz ayollari oilalarda 5-10 nafar farzand ko‘rishga intilishi kerak.

«Biz ko‘p farzandli bo‘lishimiz kerak. Ayollar, yosh kelinlar bunga e’tibor berishlari kerak. Shundagina Qirg‘iziston rivojlana oladi... Davlat xavfsizligini mustahkamlash bevosita aholi soniga bog‘liq. Agar aholi soni ko‘paymasa, xavfsizlikni ta’minlash muammoga aylanadi. Hozir dunyoda katta o‘zgarishlar ro‘y bermoqda, qo‘shni davlatlar esa aholi soni bo‘yicha bizdan oldinda. Bu masalaga jiddiy yondashishimiz kerak», - dedi Tashiyev.

Shuningdek, u davlat tug‘ilish darajasini oshirish uchun qulay shart-sharoitlar yaratishga tayyorligini ma’lum qildi. Bunday chora-tadbirlar qatoriga bolalar bog‘chalari, maktablar va boshqa ijtimoiy ob’ektlar qurilishi kiradi.

Bundan tashqari, Tashiyev hukumatning tog‘li hududlar aholisi uchun onalik kapitalini joriy etish bo‘yicha rejalari haqida gapirdi. Mamlakatning ayrim hududlarida oilalarga to‘rtinchi farzand uchun 100 ming so‘m, beshinchi farzand uchun 600 ming so‘m va yettinchi farzand uchun 1 million so‘m (taxminan 11,6 ming AQSh dollari) to‘lash rejalashtirilmoqda, deb yozadi kun.uz.

«Sakkizinchi va to‘qqizinchi farzand uchun 1,5 million so‘m, o‘ninchi farzand uchun esa 2 million so‘m to‘lov ko‘zda tutilgan... Maqsadimiz tezroq aholini 10-20 millionga yetkazish. Shunda mamlakat kelajagi haqida qayg‘urishning hojati yo‘q», — dedi Milliy xavfsizlik davlat qo‘mitasi rahbari.