Ertadan Toshkent shahrida sport gimnastikasi bo‘yicha ayollar o‘rtasida Osiyo chempionati start oladi. Unda vakilarimiz Oksana Chusovitina, Dildora Aripova, Lobar Amrillayeva va Aleksandra Shevchenko ishtirok etishi ko‘zda tutilgan. Ushbu musobaqa "Parij-2024" Olimpiada o‘yinlariga yo‘llanma berishi bilan ahamiyatli. Musobaqada quyidagi 14 ta davlat: Xitoy, Gonkong, Hindiston, Indoneziya, Qozog‘iston, Koreya, Malayziya, Filippin, Shimoliy Koreya, Singapur, Shri-Lanka, Taypey, Vyetnam, O‘zbekistondan 50 nafar gimnastlar qatnashadi.
Afsuski, gimnastika afsonasi ushbu lisenzion turnirda ishtirok eta olmaydi. Sabab shundaki, u kechagi mashg‘ulot jarayonida jarohat olgan. Osiyo chempionati Parijga yo‘llanma beruvchi oxirgi turnir hisoblanadi. 48 yoshli Oksana Chusovitina Olimpiadada ishtirok etish bo‘yicha Ginnesning rekordlar kitobiga kiritilgan yagona sportchi. U Olimpiada o‘yinlarida bir martadan oltin va kumush medal sohibasi bo‘lgan.