Myanmadagi zilzila qurbonlari soni 3000 dan oshdi

Myanmada 28 mart kuni ro‘y bergan kuchli zilzila oqibatida 3000 dan ortiq kishi halok bo‘ldi. Bu haqda Xinhua agentligi xabar bermoqda.

Ma’lumotlarga ko‘ra, ayni damda 3003 kishi halok bo‘lgan, 4515 nafar yarador va 351 kishi bedarak yo‘qolgan. Avvalroq 2,8 ming kishi halok bo‘lgani xabar qilingandi.

Eslatib o‘tamiz, 28 mart kuni Janubi-Sharqiy Osiyoda kuchli zilzila sodir bo‘lgan edi. Turli ma’lumotlarga ko‘ra, uning magnitudasi 7,7 dan 7,9 gacha bo‘lgan. AQSh Geologik xizmati zilzila markazi Mandalaydan 17,2 km uzoqlikda, 10 km chuqurlikda bo‘lganini ma’lum qildi. Shundan so‘ng 6,4 magnitudali ikkinchi zilzila sodir bo‘ldi.

Myanmada bir haftalik milliy motam e’lon qilindi. Mamlakat davlat bayrog‘i 6 aprelga qadar yarim ko‘tariladi.