Livan janubidagi janglarda isroillik ikki askar o‘ldi

Isroil Mudofaa Kuchlari Livan janubidagi harbiy operasiyalar paytida ikki askarining halok bo‘lganini xabar qildi.

Bu haqda Isroil armiyasi matbuot xizmati xabar tarqatdi.

Xabarga ko‘ra, halok bo‘lganlardan biri 23 yoshli kapitan Shahar Gamla bo‘lib, u elit Egoz maxsus kuchlari bo‘linmasida rota komandiri o‘rinbosari bo‘lib xizmat qilgan. U payshanba kuni dron hujumida og‘ir yaralangan va keyinchalik kasalxonada vafot etgan.

Golani piyoda askarlari brigadasida xizmat qilgan 21 yoshli serjant Ohad Yaari "Livan janubida operasion vazifalarni bajarayotganda" halok bo‘lgan. Ynet xabariga ko‘ra, o‘lim sababi "adashgan o‘q" bo‘lgan va Harbiy polisiya yaqin kelajakda voqea holatlarini tekshirishni rejalashtirmoqda.

17 apreldan beri Isroil va Livan janubida qurolli kuchlari faoliyat yuritadigan Livan radikal harakati "Hizbulloh" o‘rtasida rasmiy sulh amal qilmoqda. Biroq, bu davrda ikkala tomon ham Livan-Isroil chegarasi bo‘ylab chegara hududlarida hujumlarni davom ettirmoqda.