"Kurdiston ishchilar partiyasi” qurollarini topshirdi

Xalqaro maydonda terrorchi, deb tan olingan Kurdiston ishchilar partiyasi Iroq shimolidagi Sulaymoniya viloyatida qurollarini ramziy topshirish marosimini o‘tkazdi.

Anadolu nashrining yozishicha, Surdas tumani hududidagi bir g‘orda to‘plangan guruh a’zolari: 30 kishi, jumladan 15 nafar ayol, o‘z qurollarini katta alangaga tashlab, yo‘q qilgan.

Voqea joyida kurdlarning yuqori martabali a’zosi turk va kurd tilida bayonot o‘qib eshittirdi. Jarayonga guvoh bo‘lish uchun Turkiyaning Milliy razvedka tashkiloti, iroqlik rasmiylar va xavfsizlik kuchlari kelgan.

Joriy yil may oyida “Kurdiston ishchilar partiyasi” (KIP) o‘zini tarqatib yuborish va qurolni tashlash qarorini e’lon qilgan edi. Bu bayonotga — fevral oyida partiya yetakchisi Abdulloh O‘jalanning qamoqdan turib KIP va unga aloqador guruhlarni tarqatib yuborish, 40 yildan ortiq davom etgan qurolli kurashga barham berishga chaqirgan murojaati turtki bo‘lgan edi.

Maqsadlarini Turkiyadagi kurdlarning milliy huquqlari uchun kurash va kurd davlatini barpo etish deb e’lon qilgan “Kurdiston ishchilar partiyasi” 1974 yil noyabrda tashkil topgan. 1984 yildan beri Turkiya hukumatiga qarshi qurolli kurash olib borayotgan edi.

Turkiyaga qarshi 40 yillik kurash davomida KIP Turkiya, AQSh va Yevropa Ittifoqi tomonidan terrorchi tashkilot sifatida tan olingan. Ommaviy axborot vositalariga ko‘ra, ular 40 mingdan ortiq insonning o‘limiga sabab bo‘lgan.