Trampning Kuba haqidagi bayonotidan so‘ng Kuba delegasiyasi BMT zalini tark etdi.

AQSh prezidenti Donald Tramp BMT Bosh Assambleyasidagi nutqi vaqtida Kuba hukumatiga keskin baho berdi. Shundan so‘ng Kuba delegasiyasi yig‘ilish zalini tark etdi.

Tramp Kubani «to‘liq muvaffaqiyatsiz davlat» deb atab, mamlakatdagi kommunistik hukumat tarixidagi eng kuchli bosim ostida ekanini bildirdi.

«U qulashi aniq», — dedi Tramp Gavanadagi hukumat haqida. U, shuningdek, kommunizm AQShga hech qachon kelmasligini, ammo «erkinlik Kubaga kelishi»ni ta’kidladi.

AQSh prezidenti Vashington Kubaning Amerika dushmanlari uchun boshpana bo‘lishiga yo‘l qo‘ymasligini bildirdi. Shuningdek, u Kuba hukumatini AQShdagi ayrim so‘l va kommunistik tashkilotlar bilan ko‘p yillardan beri hamkorlik qilib kelayotganlikda aybladi.

So‘nggi oylarda AQSh Kubaga nisbatan bir qator sanksiyalar joriy qildi. Bu mamlakatdagi iqtisodiy va energetik muammolarni yanada og‘irlashtirgan.

Vashington Kubaning siyosiy va iqtisodiy yo‘nalishini o‘zgartirishini hamda Xitoy va Rossiyadan uzoqlashishini kutmoqda.