Evropaning yetakchi davlatlari va Ukraina Putinga ultimatum qo‘ydi: yo o‘t ochishni to‘xtatish, yo yangi sanksiyalar. Kreml ultimatumni rad etdi. Vladimir Putinni janglarni to‘xtatishga majburlash uchun Yevropa davlatlari Rossiyaga qanday sanksiyalar qo‘yishi hozircha aniq emas.
Avvalroq Fransiya, Germaniya, Buyuk Britaniya va Polsha bank va energetika sohalariga qarshi choralar haqida gapirgan edi. Bild ma’lumotlariga ko‘ra, Rossiya neft va gaziga qarshi qo‘shimcha sanksiyalar muhokama qilinmoqda. Kremlning “soya floti” deb ataluvchi – amaldagi sanksiyalarni chetlab o‘tib sotish uchun neft tashuvchi tankerlar tarmog‘i ustidan nazorat kuchaytirilishi kutilmoqda.
Bunday qadamlar barcha Yevropa Ittifoqi davlatlarining bir ovozdan qo‘llab-quvvatlashini talab qiladi. Biroq Slovakiya Bosh vaziri Robert Fiso va Vengriya Bosh vaziri Viktor Orban hamon sanksiyalarni kuchaytirishga qarshi. Yevropa Ittifoqi AQSh prezidenti Donald Tramp ularni boshqacha tarzda ishontirishga yordam beradi, deb umid qilmoqda, ammo bu umid zaif.
Bundan tashqari, Bryussel allaqachon ultimatumdan ancha oldin ishlab chiqilgan Rossiyaga qarshi 17-sanksiya paketini kelishib olgan. Biroq, Yevroittifoq diplomatlaridan biri Handelsblatt gazetasiga yangi paket ko‘lami bo‘yicha avvalgilaridan oshib ketishi dargumon ekanligini aytdi:
"Biz sanksiyalar siyosatida mumkin bo‘lgan chegaraga yetdik".
Shunday qilib, Yevropa Ittifoqining Putinga bosim o‘tkazish siyosati oldida ikkita jiddiy savol turibdi: birinchidan, Kreml uchun haqiqatan ham sezgir bo‘ladigan sanksiyalar ko‘payadimi, ikkinchidan, agar shunday bo‘lsa, ularni joriy qilish mumkinmi...
