Indoneziya Rossiyaning yangi harbiy ittifoqchisimi?

Indoneziya va Rossiya harbiy-dengiz kuchlari Yava dengizida 4—8 noyabr kunlari davom etadigan birinchi qo‘shma mashg‘ulotlarini Rossiyaning to‘rtta harbiy kemasi yetib borishi bilan boshladi.

Rossiyaning TASS davlat agentligiga bergan intervyusida Rossiyaning Jakartadagi elchisi Sergey Tolchenov bu manevrlar «Rossiya va Indoneziya o‘rtasidagi birinchi keng ko‘lamli harbiy-dengiz mashqlari» ekanligini ta’kidladi.

Tolchenovning ta’kidlashicha, bunday mashqlar muntazam bo‘lib, ma’lum vaqt oralig‘ida, masalan, har ikki yilda bir marta o‘tkazilishi mumkin.

Mamlakat prezidenti Prabovo Subianto atigi ikki hafta oldin, 20-oktabrda o‘z lavozimiga kirishgan edi. Ammo u allaqachon mamlakat xavfsizlik sohasida hamkorlik qilish uchun yangi ittifoqchilarni faol izlash niyatida ekanligini e’lon qilgan.

Tahlilchilarning fikricha, bu mashqlar Rossiyaning Osiyodagi ta’sirini kengaytirishning navbatdagi bosqichi bo‘ldi. Ukrainadagi urush boshidanoq Moskva Global Janub mamlakatlariga tayanib, ularni G‘arb sanksiyalarini qo‘llab-quvvatlamaslikka va savdo hajmini oshirishga chaqirdi.

2021 yildan buyon Rossiya va Indoneziya o‘rtasidagi tovar ayirboshlash 75 foizga o‘sdi va 4,1 milliard dollardan oshdi, dedi joriy yilning oktyabr oyida Rossiya Bosh vaziri o‘rinbosari Denis Manturov.