Ikki tomon ham urushdan charchagan: Ukraina va Rossiya o‘rtasidagi munosabatlarda o‘zgarishlar bo‘ladimi?

Turkiya Tashqi ishlar vaziriga ko‘ra, Kelasi yilda Ukraina va Rossiya o‘rtasidagi munosabatlarda o‘zgarishlar yuzaga kelishi mumkin.

"Ikki tomon ham urushdan charchaganligi sababli 2025 yilga kelib o‘zgarishlar paydo bo‘lishi mumkin. Vaziyat qanday rivojlanishini ko‘ramiz", – deya fikr bildirdi Turkiya TIV rahbari Hoqon Fidan Hürriyet nashriga bergan intervyusida.

Shuningdek, Fidan Kiyev va Moskva o‘zaro muloqot yo‘llarini izlashda davom etayotganini, biroq tomonlarning hech biri muzokara jarayonida mag‘lubiyatga uchragandek ko‘rinishni istamayotganini ta’kidladi.

"Urushning adolatli yakunlanishi Ukrainaning hududiy yaxlitligi doirasida bo‘lishi kerak", — deya qo‘shimcha qildi Turkiya Tashqi ishlar vaziri.

Avvalroq Turkiya prezidenti Rajab Toyyib Erdog‘on Putin Ukrainadagi urushni tugatishni xohlayotganini aytgan edi.