“Hizbulloh” Isroiga qarshi urushni kuchaytirishini ma’lum qildi

Livanning “Hizbulloh” guruhi juma kuni Isroilga qarshi urush keskinlikning yangi bosqichiga kirayotganini ma’lum qildi. Eron esa XAMAS yetakchisi Yahyo Sinvar o‘ldirilganidan keyin “qarshilik ruhi kuchayishini” aytdi.

“Hizbulloh” Isroil bilan ziddiyat keskinlikning yangi bosqichiga kirayotganini ma’lum qilib, taranglikning mohiyati yaqin kunlarda ma’lum bo‘lishini aytdi. Isroil harbiylariga ko‘ra, juma kuni ertalab Livan janubidan Isroil shimoliga 15 ga yaqin raketa uchirilgan. Sohil bo‘yidagi Akko shahri va Isroil shimoli-g‘arbidagi shaharlarda raketa sirenalari yangradi. Harbiylarga ko‘ra, raketalarning bir qismi urib tushirilgan, qolganlari Isroil hududiga tushgan.

2023 yil 7 oktyabr kuni G‘azo sektorida urush boshlagan hujum uyushtiruvchisi Sinvar chorshanba kuni Isroil kuchlari tomonidan Falastin anklavida o‘tkazilgan operasiyada o‘ldirildi. Bu bir yil davom etgan urushda muhim voqea edi.

G‘arb yetakchilari uning o‘limi mojaroga chek qo‘yishini aytishsa, Isroil Bosh vaziri Binyamin Netanyaxu urush XAMAS jangarilari tomonidan garovga olinganlar qaytarilmaguncha davom etishini aytdi.

“Bugun biz hisobni tenglashtirdik. Bugun yovuzlikka zarba berildi, ammo bizning vazifamiz hali tugamadi”, - dedi Netanyaxu payshanba kuni Sinvarning o‘limi tasdiqlanganidan keyin qilingan videomurojaatida.

Iyul oyida Tehronda siyosiy yetakchi Ismoil Xoniya o‘ldirilganidan so‘ng XAMASning oliy yetakchisiga aylangan Sinvar so‘nggi yigirma yil davomida G‘azo ostidagi XAMAS tomonidan qurilgan tunnellar labirintida yashirinib yurgani aytiladi.

Isroil rasmiylariga ko‘ra, u chorshanba kuni G‘azo janubida uning Sinvar ekanligini bilmagan isroillik askarlar tomonidan otishmada halok bo‘lgan.