Germaniyada Sun’iy intellekt ov boshladi

Germaniyadagi nodir antikvar nashrlar bilan savdo qiluvchi kitob do‘konlari kutilmagan talabga duch keldi. Sun’iy intellektga ixtisoslashgan kompaniyalar til modellari va chat-botlarni o‘qitishda foydalanish uchun bunday kitoblarni katta partiyalarda sotib olmoqda.

Antikvar kitob sotuvchilarining so‘zlariga ko‘ra, ayrim buyurtmalar ularning yillik daromadiga teng kelmoqda. Bunda asosiy e’tibor ilmiy-ommabop va akademik kitoblarga qaratilyapti. SI ishlab chiquvchilari internetda hali mavjud bo‘lmagan tarixiy til variantlari va uslubiy nozikliklarni o‘z ichiga olgan mintaqaviy tarix, tilshunoslik, huquqshunoslik va iqtisodga oid eski kitoblarni maqsadli ravishda izlashmoqda.

Ommaviy axborot vositalari ma’lumotlariga ko‘ra, SI mavjud raqamli matnlarning katta qismini qayta ishlab bo‘lganidan keyin diqqat-e’tibor bosma nashrlarga ko‘chgan. Raqamlashtirish uchun millionlab kitoblar skanerlanmoqda, ba’zi nusxalar esa shundan so‘ng qismlarga ajratilib, amalda yo‘q qilinyapti.

Germaniyalik kitob savdogarlari madaniy merosning yo‘qolishidan xavotirga tushib, ushbu vaziyatga e’tibor qaratishga chaqirmoqda. Ularning fikricha, eski kitoblarning ommaviy ravishda sotib olinishi va yo‘q qilinishi hali ham mualliflik huquqi bilan himoyalangan qimmatli nashrlarga zarar yetkazishi mumkin.