Eron AQShning mamlakat hududiga bergan yangi zarbalaridan so‘ng raketa va dronlar bilan javob hujumlarini boshladi. Bu haqda Eron xavfsizlik kuchlariga yaqin sanaladigan Fars va Tasnim yarimrasmiy axborot agentliklari xabar berdi.

Agentliklar ma’lumotiga ko‘ra, Eron Amerika zarbalariga javoban raketa va uchuvchisiz qurilmalarni ishga tushirgan.

Avvalroq AQSh harbiylari Tehronning Yaqin Sharqdagi tijoriy kemalar va amerikalik harbiylarga hujum qilishga uringanini bildirib, Erondagi nishonlarga zarba bergan edi.

Navbatdagi o‘zaro zarbalar AQSh va Eron o‘rtasida olti oydan ortiq vaqt davom etayotgan urushda vaziyat yana keskinlashgan bir paytda sodir bo‘ldi.