Dunyo tobora Isroildan yuz o‘girmoqda

Isroilning sobiq bosh vaziri Yair Lapid mamlakatning xalqaro maydondagi mavqei yomonlashayotganini Netanyaxu hukumati siyosati hamda XAMAS, Qatar va Eronning ko‘p yillik sa’y-harakatlari bilan bog‘ladi.

«XAMAS, Qatar va Eron doimo bizni dunyodan uzib qo‘yishni istagan. Endi esa dunyoning o‘zi bizdan yuz o‘girmoqda», — dedi Lapid Tel-Avivdagi Rayxman universitetida o‘tkazilgan xalqaro konferensiyada.

U misol sifatida Gaagada berilgan hibsga olish orderlari, Niderlandiya aeroportlarida isroilliklarning yuklari tekshirilayotgani, Irlandiyadagi futbol uchrashuvlari atrofidagi mojarolar, «Evrovideniye» boykotlari hamda Binyamin Netanyaxu BMT Bosh Assambleyasida nutq so‘zlayotgan vaqtda ko‘plab davlatlar vakillarining zalni tark etganini keltirdi.

«Ular buning ustida yillar davomida ishlashdi va endi bu sodir bo‘lmoqda», — dedi Lapid. Uning ta’kidlashicha, ushbu voqealar tasodif emas, balki XAMAS, Qatar va Eronning rejasi va maqsadlarini aks ettiradi.

Lapid avval ham Netanyaxu hukumatini Isroilning xalqaro munosabatlarga yondashuvi uchun bir necha bor tanqid qilgan.

Ayni paytda Netanyaxu pora olish, firibgarlik va ishonchni suiiste’mol qilish bo‘yicha uchta yirik korrupsiya ishida ayblanmoqda. 2024 yilda Xalqaro jinoiy sud ham G‘azo sektoridagi harbiy jinoyatlar va insoniyatga qarshi jinoyatlar bo‘yicha unga nisbatan hibsga olish orderini bergan.

2023 yil oktyabridan, G‘azo sektoridagi urush boshlanganidan keyin, Isroil harbiylari 74 mingdan ortiq falastinlikni o‘ldirgan, 175 mingdan ziyodini yaralagan. Anklav infratuzilmasining qariyb 90 foizi zararlangan yoki vayron qilingan.