Belgiya poytaxti Bryusselda o‘n minglab odamlar iqlim o‘zgarishiga qarshi kurashish bo‘yicha aniq choralar ko‘rishni talab qilib yurish qildilar. Norozilik namoyishi BMTning COR31 iqlim konferensiyasi arafasida bo‘lib o‘tdi, deb xabar beradi Euronews.
Yurish ishtirokchilari shahar ko‘chalari bo‘ylab yurish qilib, Yevropa Ittifoqining bosh qarorgohi tomon yo‘l olishdi. Ular rasmiylardan global isishga qarshi kurashni kuchaytirishni va ekologik muammolarni siyosiy kun tartibiga qo‘yishni talab qilishdi.
Polisiya ma’lumotlariga ko‘ra, yurishda 45 000 kishi ishtirok etgan. Tashkilotchilarning aytishicha, bu son 60 000 ga yaqinlashgan.
Miting Climate Coalition harakati tomonidan boshqa jamoat va siyosiy tashkilotlar bilan hamkorlikda tashkil etildi.
Yurish ishtirokchilari beshta asosiy talabni ilgari surishdi. Xususan, qazilma yoqilg‘ilar uchun subsidiyalarni bekor qilish, ushbu sohaga qo‘shimcha soliqlar kiritish, yashil maydonlarni ko‘paytirish, atrof-muhit o‘zgarishiga ijtimoiy jihatdan adolatli yondashuvni ta’minlash, fuqarolar va biznesni qo‘llab-quvvatlash va xalqaro iqlim hamkorligini mustahkamlash taklif qilindi.
Flandriya va Bryusseldagi “Yashilllar” partiyasi raisi Aymen Xorxning so‘zlariga ko‘ra, Yevropadagi issiqlik to‘lqinlari va o‘rmon yong‘inlari iqlim o‘zgarishi kundalik hayotga bevosita ta’sir qilayotganini ko‘rsatdi.
— Odamlar issiqdan o‘ldi. Ularning uylari shunchalik qizib ketdiki, ular kechalari uxlay olmaydilar. Ular mamlakatdagi eng muhim qo‘riqxonalardan biri bo‘lgan Yuqori Fennda o‘rmon yong‘inlarini ko‘rishdi. Ammo ular rasmiylarning tegishli choralar ko‘rmaganiga guvoh bo‘lishdi, — dedi u.
Aymen Xorx iqlim masalasi siyosiy kun tartibidan chetlashtirilayotganidan xavotir bildirdi.
Uning so‘zlariga ko‘ra, iqlim maqsadlarini himoya qilish uchun kurash Yevropa Parlamentida ham, Belgiyaning o‘zida ham olib borilishi kerak bo‘ladi. Chunki issiqlik to‘lqinlari va iqlim o‘zgarishining odamlar hayotiga ta’siri hali ham dolzarbdir.
Norozilik namoyishi noyabr oyida Turkiyaning Antaliya shahrida bo‘lib o‘tadigan BMTning COR31 iqlim konferensiyasi arafasida tashkil etilgan.
Biroq, mutaxassislarning ta’kidlashicha, bo‘lajak uchrashuvdan sezilarli natijalar kutish qiyin. Bu AQShning xalqaro iqlim muzokaralaridan chiqishi va Yevropada ekologik siyosatning sekinlashishi bilan bog‘liq.
Evropa Ittifoqi o‘zini iqlim sohasidagi dunyo yetakchilaridan biri sifatida ko‘rsatayotgan bo‘lsa-da, yaqinda bir qator ekologik talablarni yumshatishni boshladi.
Masalan, sentyabr oyida Yevropa Komissiyasi metan chiqindilarini tartibga soluvchi qonunning kuchga kirishini 2027 yildan 2028 yilga kechiktirishni taklif qildi.
