Britaniyada yuzlab jinoyatchilar qamoqxonalarda joy yo‘qligi sababli ozodlikka chiqish arafasida

Buyuk Britaniyada mingdan ortiq jinoyatchi qamoqxonalarda joy yetishmasligi sababli muddatidan oldin ozodlikka chiqishni rejalashtirmoqda. Bu haqda ITV xabar berdi .

Sentyabr oyida xuddi shu sabab bilan 1,7 ming mahbus shartli ravishda ozod qilingan edi. Shu bilan birga, 40 nafar jinoyatchi xato bilan ozod qilindi - ular keyinchalik qamoqxonaga qaytarildi. «Yana 1,1 ming mahbus kelasi hafta boshida ozod qilinadi», — deyiladi bayonotda. Britaniyaning The Times gazetasiga ko‘ra , bu 22-oktabr, seshanba kuni sodir bo‘ladi.

2023 yil boshidan beri Buyuk Britaniyadagi erkaklar qamoqxonalari muntazam ravishda 99 foiz sig‘imga yetdi. Britaniya Adliya vazirligining ichki prognozlariga ko‘ra, yaqin to‘qqiz oy ichida qamoqxonalarda yana joy yetishmaydi.