Bolgariyada GPS signalining o‘chirilishi tufayli Yevrokomissiya rahbarining samolyoti qog‘oz xaritalar yordamida qo‘ndirildi

Bu haqda Financial Times nashri xabar bermoqda.

Bolgariyaning Plovdiv aeroportidagi GPS navigasiya tizimlariga Rossiyaning ehtimoliy hujumi sababli, Ursula fon der Lyayenni olib ketayotgan samolyot uchuvchilari qog‘oz xaritalardan foydalanishga majbur bo‘lgan, deya xabar bermoqda gazeta.

Manbalarining aytishicha, GPS signali butun aeroport hududida yo‘qolgan va bu “tashqi aralashuv” natijasida yuzaga kelganini ta’kidlashgan. Bolgariya havo harakati boshqarmasi ham hodisani tasdiqlagan va 2022 yil fevralidan buyon GPS signallarini o‘chirib qo‘yish holatlari ortib borayotganini ma’lum qilgan.

Rossiya bilan chegaradosh Boltiqbo‘yi mamlakatlari ham shunday holatlarni qayd etmoqda.

"Ursula fon der Lyayen hozirda Yevropa Ittifoqiga a’zo, Belarus yoki Rossiya bilan umumiy tashqi chegaraga ega bo‘lgan davlatlarga safar uyushtirmoqda. Bolgariya va Polshadan keyin u Litvaga tashrif buyurgan va mamlakat prezidenti Gitanas Nauseda bilan birgalikda vertolyotda Litva-Belarus chegarasini aylanib chiqqan", deya xabar bermoqda FT.