BMT agentligi Isroilning «dezinformasiya kampaniyasi»ning nishoniga aylandi

UNRWA Bosh komissari Isroil UNRWA va uning xodimlarini obro‘sizlantirish uchun yolg‘on ma’lumot tarqatganini ma’lum qildi.
Birlashgan Millatlar Tashkilotining Yaqin Sharqdagi Falastinlik Qochqinlarga yordam va Ishlar Agentligi yana Isroil tomonidan «dezinformasiya kampaniyasi»ning nishoniga aylandi. Bu haqda UNRWA komissari Filipp Lazarini ma’lum qildi.

«Yana bir bor tasdiqlanmagan ma’lumotlardan UNRWA va uning xodimlarini obro‘sizlantirish uchun foydalanilmoqda», deb yozdi u Xda.
Uning qayd etishicha, ijtimoiy tarmoqlar va Isroil OAVlarida G‘azoda XAMAS rahbari bilan birga UNRWA xodimi halok bo‘lgani haqida xabarlar tarqalgan.

«Men bu xodimning tirikligini tasdiqlayman. U hozirda Misrda yashaydi, u erda aprel oyida oilasi bilan Rafah chegarasini kesib o‘tgan.»
- qo‘shimcha qildi u.
Bundan tashqari, UNRWA Bosh komissari dezinformasion kampaniyalarni to‘xtatishga chaqirdi.

UNRWA (Birlashgan Millatlar Tashkilotining Yaqin Sharq bo‘yicha agentligi) 1949 yilda tashkil topgan. Birlashgan Millatlar Tashkiloti Bosh Assambleyasi UNRWAga «Falastinlik qochqinlarga» yordam berishni buyurdi. Agentlikda ro‘yxatdan o‘tgan falastinlik qochqinlar uning xizmatlaridan UNRWA faoliyat yuritadigan hududlarda foydalanish huquqiga ega. Bular Livan, Iordaniya, Suriya, G‘arbiy Sohil, jumladan, Sharqiy Quddus va G‘azo sektori. UNRWA xizmatlariga ta’lim, sog‘liqni saqlash, yordam va ijtimoiy xizmatlar, qochqinlar lageri infratuzilmasini rivojlantirish va qo‘llab-quvvatlash hamda mikromoliya kiradi.