AQSh Davlat departamenti islohotlar doirasida 1 300 dan ortiq xodimni ishdan bo‘shatdi

Juma kuni AQSh Davlat departamentida keng ko‘lamli qayta tashkillash ishlari doirasida 1 300 dan ortiq xodim ishdan bo‘shatildi. Bu haqda CNN telekanali Davlat departamentidagi manbasiga tayanib xabar berdi.

Ichki xabarnoma ma’lumotlariga ko‘ra, ishdan bo‘shatishlar Vashington shahridagi 1 107 nafar fuqarolik xizmatchilari va 246 nafar tashqi xizmat ofiserlarini qamrab oldi. Bu ishdan bo‘shatishlar Tramp ma’muriyatining federal hukumatni qisqartirish bo‘yicha umumiy sa’y-harakatlari doirasida amalga oshirilmoqda.

Ishdan bo‘shatilgan xodimlar orasida quyidagi sohalarda faoliyat yuritgan mutaxassislar bor:

• Zo‘ravonlik ekstremizmiga qarshi kurash

• Tolibon hokimiyatidan so‘ng Afg‘onistondan qochganlarga yordam

• Ta’limiy almashinuv dasturlari

• Ayollar huquqlari, qochqinlar va iqlim o‘zgarishi bilan bog‘liq masalalar

Islohotlar natijasida yuzlab bo‘limlar va idoralar yopiladi yoki tubdan qayta tashkil etiladi. Juma kuni tarqatilgan elektron xabarnomada shunday deyiladi:

«Qayta tashkillashtirish natijasida taxminan 3 000 nafar xodim departamentni tark etadi. Bu raqam ishdan bo‘shatilganlar va ixtiyoriy ravishda ishdan ketganlarni o‘z ichiga oladi».

Ishdan bo‘shatish paytida Davlat departamenti binosida xodimlarga minnatdorlik bildiruvchi yozuvlar osildi. Qolgan xodimlarni «fashizmga qarshi turish» va «bergan qasamingizni eslash»ga chorlovchi plakatlar ham ko‘rindi.

Kun oxirida Davlat departamenti binosi oldida ishdan bo‘shatilgan hamkasblarini kuzatish uchun odamlar saf tortdi. Ba’zilar ko‘z yoshi bilan, boshqalar esa qutilarni ko‘targan holda chiqib ketdi, yuzlab insonlar ularni olqishlar bilan kutib turdi.

20 yillik diplomatik tajribaga ega bo‘lgan, juma kuni ishdan bo‘shatilgan diplomat Olga Bashbush CNNga shunday dedi:

«Bu bo‘shatishlar hurmat va qadr-qimmat bilan amalga oshirilmadi. Ammo men Davlat departamentni yuzim baland holda tark etdim. Biz xizmat qilish uchun kelganmiz va hanuz tayyormiz».

Rallida ishtirok etgan sobiq diplomatlar va Demokratik partiya vakillari ushbu ommaviy ishdan bo‘shatishlarni qoraladi. Ular bu qaror diplomatik sa’y-harakatlar juda muhim bo‘lgan bir paytda qabul qilinganini ta’kidlab, uning salbiy oqibatlarini ta’kidlashdi.

Shuningdek, Tramp ma’muriyatining qayta tashkillashtirish siyosati ham tanqid ostiga olindi — unda asosiy e’tibor immigrasiyani cheklash va hukumatning geosiyosiy qarashlarini ilgari surishga qaratilgan, xalqaro maydonda inson huquqlarini himoya qilish esa ikkinchi o‘ringa surilgan.