Trampning Ukraina va Rossiyaga ultimatumi

Tramp Ukraina va Rossiyaga to‘g‘ridan-to‘g‘ri muzokaralarni boshlash kerakligi, "aks holda AQSh ketishi" haqida "ultimatum" qo‘ydi.

Bu haqda Trampning maxsus vakili Stif Uitkoff Breitbart News’ga bergan intervyusida ma’lum qildi. Intervyu payshanba kuni (ya’ni Zelenskiy va yevropaliklarning 30 kunlik sulhga chaqirig‘i va 15 may kuni Istanbulda muzokaralar o‘tkazish to‘g‘risidagi qaroridan oldin) yozib olingan.

"Prezident har ikki tomonga ushbu to‘g‘ridan-to‘g‘ri muzokaralarsiz va agar ular tezda amalga oshmasa, uning fikricha, Qo‘shma Shtatlar bu mojarodan, nima bo‘lishidan qat’i nazar, chekinishi va shunchaki unda ishtirok etmasligi kerakligi haqida ultimatum qo‘ydi," - dedi Uitkoff.

U avval o‘t ochishni to‘xtatish, keyin esa murakkabroq masalalarni hal qilish kerakligini uqtirdi. "Bu shunday sodir bo‘ladi: o‘t ochishni to‘xtatish, hamma zo‘ravonlikni to‘xtatadi va biz asosiy muammolarni hal qila olishimizga ishonch hosil qilish uchun birgalikda biroz vaqt o‘tkazamiz," - dedi Uitkoff.

Uning so‘zlariga ko‘ra, gap bahsli beshta hudud, Zaporoje AESi va "ukrainaliklar Dnepr daryosidan qanday foydalanishi va Qora dengizga chiqishi mumkinligi" haqida ketmoqda.

ZAES mavzusiga alohida to‘xtalar ekan, Uitkoff stansiya o‘zining quvvati tufayli "tojdagi o‘ziga xos marvarid" ekanligini va hozirda bu "muhokamaning katta qismi" ekanligini aytdi.

Ammo "asosiy qoqilish toshlari beshta mintaqa bilan bog‘liq." Maxsus vakilning so‘zlariga ko‘ra, AQSh Kiyev va Moskvaga hududiy yon berishni taklif qilmoqda.

"Gap biz qanday baholashimiz haqida ketmoqda - front chizig‘i qayerdan o‘tishi, qo‘shinlar va ma’muriy chiziqlar qayerda joylashishi o‘rtasida farq bor... Biz bu sohalarning ba’zilarida Rossiya uchun nima maqbul bo‘lishi haqida gaplashmoqdamiz. Ma’lum ma’muriy chegaralardan chetga chiqishga tayyormisiz? Ukrainaliklar bilan ham xuddi shunday," - dedi Uitkoff.