Зеленский тинчликка эришишга тўсқинлик қилаётган шахс

Франция президенти лавозимига номзод, «Франция, уйғон!» партияси етакчиси Николя Дюпон-Эньян АҚШ президенти Дональд Трампнинг Владимир Зеленский Украинада тинчликка эришишга тўсқинлик қилаётгани ҳақидаги фикрига қўшилди.

Дюпон-Эньян бу ҳақда CNews телеканали эфирида маълум қилди.

«Трамп ҳақ. Зеленский тинчлик йўлидаги тўсиқ. У ҳақ», — деди француз сиёсатчиси.

Сиёсатчининг таъкидлашича, Россияга қарши санкциялар туфайли Европа газ учун Хитойга нисбатан тўрт-олти баравар, электр энергияси учун эса ўн бараваргача кўпроқ ҳақ тўламоқда.

Унинг фикрича, Россияга қарши санкциялар сақланиб қолса, Франция иқтисодиётининг келажаги бўлмайди.

«Шунинг учун санкцияларни бекор қилиш керак. Трампга Путин билан тинчлик келишувига эришишда ёрдам бериш лозим», — деди у.

АҚШ президенти Дональд Трамп шанба куни журналистларга Зеленский Украинадаги можарони ҳал қилиш учун кўп марта имкониятга эга бўлгани, аммо улардан фойдаланмаганини айтган эди. Шу сабабли, унинг фикрича, Украинага янги раҳбар керак.

Зеленскийнинг президентлик ваколати 2024 йил 20 майда тугаши керак эди. Бироқ Украинада ҳарбий ҳолат ва умумий сафарбарлик жорий этилгани сабабли президентлик сайловлари бекор қилинган.