Зеленский Украинанинг Мустақиллик куни муносабати билан мурожаат эълон қилди

Украина президенти ўз мурожаатида тинчлик ва хавфсизлик кафолатлари масаласига тўхталди.

"Украина энди ҳеч қачон тарихда руслар “муроса” деб атайдиган шармандаликка мажбур қилинмайди. Бугун Украинани эшитишяпти, Украина билан ҳисоблашишяпти, бизга қулоқ тутишяпти. Украинанинг ўрни музокаралар столида. Энди бизга “Эшик ортида кутиб туринг”, дейишмайди. Бугун АҚШ ҳам, Европа ҳам “Украина ҳали ғалаба қозонмади, аммо ютқазгани ҳам йўқ”, деган фикрда", — деди Зеленский.

"Украина иттифоқчилик ва ҳамкорликни сўрамайди, у таклиф қилади. Биз Европадаги энг кучли армия, энг илғор мудофаа технологияларини, матонатли тажрибани таклиф қиламиз. Бизга Европа Иттифоқи керак, аммо биз ҳам унга камида шунчалик керакмиз. Буни ҳамма тан олади. Украинани кучли иттифоқчи сифатида тан олишади", — дея таъкидлади Украина етакчиси.

Унинг сўзларига кўра, уруш якунида Украина учун “барқарор, ишончли ва узоқ муддатли тинчликни таъминлаш” зарур бўлади.

"Украина буни қўлга киритади, чунки хавфсизлик кафолатларини олади. У шунчалик кучли бўлади-ки, дунёда ҳеч кимнинг хаёлига Украинага ҳужум қилиш фикри келмайди", — дея қўшимча қилди Зеленский.