Зеленский Трампга «ғалаба режаси»ни ошкор этгандан сўнг, унинг ваъдасини олди

Зеленскийнинг айтишича, Трамп Россия билан урушда Украинани қўллаб-қувватлашга ваъда берган.

Украина президенти Владимир Зеленский АҚШнинг Фох Неwс телеканалига берган интервьюсида Доналд Трампдан АҚШнинг собиқ президенти ноябрь ойида бўлиб ўтадиган президентлик сайловларида қайта сайланса, Украинани Россияга қарши урушда қўллаб-қувватлаши ҳақида «аниқ маълумот» олганини айтди.

Бирлашган Миллатлар Ташкилоти Бош Ассамблеяси учун АҚШда бўлган Зеленский жума куни ёпиқ эшиклар ортида бўлиб ўтган учрашувда Трампга ўзининг уруш «ғалаба режаси»ни тақдим этди.

Учрашувдан сўнг Фох Неwс телеканалига берган интервьюсида Зеленский шундай деди: “Сайловлардан кейин нима бўлишини ва ким президент бўлишини билмайман... Лекин мен Доналд Трампдан у бизнинг томонимизда бўлиши ҳақида тўғридан-тўғри маълумот олдим, у Украинани қўллаб-қувватлайди".

АҚШ вице-президенти, Демократик партиядан президентликка номзод Камала Харрис ва президент Жо Байден билан ҳам учрашган Зеленский Россия билан давом этаётган урушда АҚШдан ягона ёрдам излаётганини ва АҚШ сайловларида ҳеч бир томонни қўллаб-қувватламаслигини айтди.

«Мен сайловлар жараёнида иштирок этишни хоҳламайман... Мен америкаликларнинг у ёки бу қисмини йўқотмоқчи эмасман», — деди Зеленский.