Зеленский Руминиянинг янги сайланган президенти билан Россияга қарши санкцияларни кучайтиришни муҳокама қилди

Украина президенти Владимир Зеленский ва Руминиянинг янги сайланган президенти Никушор Дан Европада тинчлик ўрнатиш йўлида халқаро дипломатик майдондаги ҳамкорлик йўналишларини, хусусан, Россияга қарши санкцияларни кучайтириш зарурлигини муҳокама қилди.

Бу ҳақда Украина етакчиси ўзининг Телеграм-каналида ёзган.

"Украина ва бутун Европада тинчликка эришиш бўйича дипломатик ишларни, Истанбулдаги учрашувни, Москванинг ҳарбий ишлаб чиқаришни кўпайтириши ва урушни давом эттиришига йўл қўймаслик учун Россияга қарши санксияларни кучайтириш зарурлигини муҳокама қилдик. Биз Гаагада бўлиб ўтадиган НАТО саммитига алоҳида эътибор қаратдик", — деди Зеленский.

Украина президенти Данга “Украина Руминиянинг доимий ёрдамига ишониши, ЕИ ва НАТОга аъзоликни қўллаб-қувватлаши ҳамда президентнинг Одессада бўлиб ўтадиган Украина – Жануби-Шарқий Европа саммитида шахсан иштирок этишини тасдиқлагани учун” ташаккур билдирди.

Қайд этилишича, Зеленский Данни Истанбулдаги учрашув ҳақида хабардор қилган. Унинг қайд этишича, афсуски, бу бизни тинчликка яқинлаштирадиган қадамлар бўлмади, бироқ Украина учун жуда муҳим бўлган маҳбусларни алмашиш ва ўлганларнинг жасадларини қайтариш бўйича келишув мавжуд.

"Шунингдек, у Украинанинг Россия агрессиясига қарши курашда тўплаган технологик тажрибаси ҳақида гапириб, мудофаа соҳасида ҳамкорликни чуқурлаштиришни таклиф қилди. Президент Украина иқтисодиёт, инфратузилма ва реконструксия соҳасида янги лойиҳаларга очиқ эканини қўшимча қилди", — дейилади давлат раҳбари матбуот хизмати хабарида.

Зеленский Дан билан суҳбатда Украина Гаагада муносиб тарзда намоён бўлиши кераклигини, шунинг учун бу масалада ҳар бир давлатнинг ҳар бир овози ва қўллаб-қувватлаши муҳимлигини таъкидлади.

Ўз навбатида, Дан учрашув якунлари бўйича Х ижтимоий тармоғида шундай деб ёзди: "Украина халқи эркинлик ва демократия деган умумий қадриятларимизни ҳимоя қилишда катта жасорат кўрсатишда давом этмоқда. Одил ва мустаҳкам тинчликка фақат куч билан эришиш мумкин. Руминия Украинани қўллаб-қувватлашда ва халқларимиз фаровонлиги йўлида икки томонлама алоқаларимизни янада чуқурлаштиришда давом этади".

Эслатиб ўтамиз, Украина президенти Вилнюсда бўлиб, “Бухарест тўққизлиги” ва Шимолий Европа давлатлари саммитида иштирок этмоқда.