Украина президенти Владимир Зеленский Россиянинг энергетика объектларига берган зарбаларидан сўнг мамлакат жавоб чоралари кўриши лозимлигини билдирди. Бу ҳақда у журналистлар билан бўлган брифингда айтиб ўтди.
«Ҳужумлардан кейинги вазифамиз — душманга жавоб бериш. Биз, аввало, ўзимизни ҳимоя қилишимиз керак», — деди Зеленский.
Президентнинг таъкидлашича, Россия ҳозир қўшинларини тўплаб, ёғингарчилик ва туманли ҳавони кутмоқда, чунки бундай шароитлар Украина ҳаво ҳимояси, айниқса авиацияси учун қийинчилик туғдиради.
«Улар нима қилаётганини яхши билишади. Биз ҳам нима қилиш кераклигини биламиз», — деди Зеленский.
Унинг сўзларига кўра, Украинада 203 та асосий объект мавжуд бўлиб, уларни Россия зарбаларидан ҳаво ҳимоя тизимлари билан муҳофаза қилиш зарур.
Зеленский, шунингдек, АҚШ президенти Дональд Трамп билан бўлган охирги учрашувида “Tomahawk”, HIMARS ва ATACMS ракеталарини Украинага етказиб бериш масаласи муҳокама қилинганини айтди.
«Биз Нью-Йоркдаги учрашувда нафақат Tomahawk ҳақида, балки HIMARS ва ATACMS ҳақида ҳам гаплашдик. Агар бизда 40–60 та ATACMS бўлса ҳам, бу етарли эмас», — деди у.
Президентнинг таъкидлашича, Украина ҳозир 140–150 та маҳаллий дрондан фойдаланмоқда ва 300–350 тагача йиғиш имкониятига эга.
Зеленскийнинг сўзларига кўра, жума куни кечқурун Россия томонидан 500 га яқин дрон ва 32 та ракета (уларнинг кўп қисми баллистик) ишлатилган.
«Бунга ягона жавоб — кўпроқ куч, кўпроқ ҳимоя. Россияга босимни кучайтириш, ҳар бир қилмиши учун жавобгарликка тортиш ва санкцияларни ошириш керак», — деди Украина раҳбари.
У шундай ҳам қўшимча қилди:
«Россия активларидан, биринчи навбатда, мудофаамизни мустаҳкамлаш ва тикланишимиз учун тўлиқ фойдаланиш керак.»
Зеленский Европа етакчилари билан ҳам молиявий ёрдам ва мудофаа масалаларини муҳокама қилганини маълум қилди.
«Бугун мен Финляндия президенти Александр Стубб билан суҳбатлашдим. Биз ҳаётни ҳимоя қилишга ёрдам берадиган кейинги қадамларимиз ҳақида гаплашдик», — деди у.
Президент, шунингдек, Европа Марказий банки раҳбари Кристин Лагард билан Украина энергетика соҳаси учун молиявий ёрдам имкониятларини муҳокама қилган.
Шу билан бирга, Зеленский Буюк Британия бош вазири Кей Стармер билан учрашиб, Британиянинг PURL дастурида иштирокини муҳокама қилганини қайд этди. Бу дастур Украинага Америка қуролларини, жумладан Patriot ракеталарини сотиб олиш имконини беради.
Президент, шунингдек, Германия канцлери Фридрих Мерц билан боғланиб, Россия зарбалари оқибатлари ҳақида маълумот берганини ва Украинадаги ҳаво ҳимоя тизимлари учун миннатдорлик билдирганини айтди.
«Бизга сўз билан эмас, амалда ёрдам берган ҳамкорларимизга миннатдорман», — деди у.
Зеленский Украина ва Нидерландия ўртасида дронларни биргаликда ишлаб чиқариш ҳақидаги меморандум имзоланганини ҳам маълум қилди.
«Бу икки томонлама ҳамкорликнинг муҳим ва истиқболли йўналиши. Нидерландия ҳукумати ва халқига Украинага кўрсатаётган ёрдами учун миннатдорман. Можаро бошлангандан бери бу ёрдам 9 миллиард долларни ташкил этди», — деди у.
Президент сўзларига кўра, Нидерландия PURL ташаббусига тахминан 600 миллион доллар ҳисса қўшган.
«Нидерландия мудофаа вазири Рубен Брекелманс билан дрон ишлаб чиқариш ва ушбу ташаббусни амалга ошириш бўйича муҳокамалар ўтказдик. Халқимизни қўллаб-қувватлаётганингиз учун миннатдорман», — дея якунлади Зеленский.
Шаҳноза Мирзиёева ҳалқдан ёрдам сўради (фото)
Йирик астероид Ой билан тўқнашди (видео)
Қирғизистон ҳам пойтахтини кўчирмоқчи
