Украина президенти Владимир Зеленский Украина қуролли кучлари иштирокида Европанинг умумий ҳарбий тузилмасини яратиш ғоясини илгари сурди, чунки АҚШга таяниб яшаш мумкин бўлган давр ортда қолди.
Зеленский бу ҳақда 15 февраль куни Мюнхен хавфсизлик конференциясидаги нутқида айтиб ўтди. Унинг сўзларини Украина оммавий ахборот воситалари келтирмоқда.
"Кўплаб раҳбарлар Европага ўз армияси - Европа армияси кераклиги ҳақида гапиришди. Менимча, бунинг вақти етиб келди. Европа қуролли кучлари ташкил этилиши лозим... Гап фақатгина мудофаа харажатларини ялпи ички маҳсулотга нисбатан фоизларда ошириш ҳақида эмас. Ҳа, маблағ керак - аммо пулнинг ўзи душман ҳужумини тўхтата олмайди. Одамлар ва қурол-яроғлар бепул берилмайди, лекин масала фақат бюджетда эмас. Асосийси, одамларнинг ўз уйини ҳимоя қилиш зарурлигини англашидадир. Украина армиясисиз Россияни тўхтатиш учун Европа армиялари етарли бўлмайди. Европада фақат бизнинг армиямиз ҳақиқий, замонавий жанговар тажрибага эга. Аммо бизнинг армиямизнинг ўзи ҳам етарли эмас. Бизга сиз тақдим эта оладиган нарсалар керак. Қурол-аслаҳа. Таълим. Санкциялар. Молиялаштириш. Сиёсий босим. Ва бирлик... Биз Европа Қуролли кучларини барпо этишимиз лозим," - дея таъкидлади Украина президенти.
Зеленский "ғалаба режаси"да агар Украина НАТОга аъзо бўлса, АҚШнинг Европадаги ҳарбий иштирокининг бир қисмини Украина кучлари билан алмаштиришни таклиф қилганини эслатиб ўтди: "Агар америкаликлар ўз иштирокини камайтириб, бу йўлдан боришга қарор қилса, бу ёмон, бу хавфли, бироқ биз Европада барчамиз бунга тайёр туришимиз керак." "Бошқаларга Европа кучини ҳурмат қилишдан ўзга чора қолмаслиги учун ўз кучимизга ишонч зарур. Европа армиясисиз эса бунга эришиб бўлмайди. Яна бир бор такрорлайман - Европанинг ўз қуролли кучларига эҳтиёжи бор," - дея даъват қилди Украина президенти.
