Запороже атом электр станцияда ядровий ҳодиса юз бериш хавфи мавжуд — Зеленский

Владимир Зеленский БМТ Бош Ассамблеясидаги нутқида Россия армияси томонидан эгаллаб олинган Запороже АЭСни "Европа ва эҳтимол бутун дунёда радиациявий хавфнинг асосий манбаи", деб атади.

Украина раҳбарининг сўзларига кўра, шунинг учун у тақдим этган "тинчлик формуласида" биринчи ва муҳим пункт ядровий хавфсизлик масаласи ҳисобланади.

Зеленский шунингдек, Россия армияси аллақачон Украинадаги барча иссиқлик электр станциялари ва мамлакат гидроэнергетика қувватларининг катта қисмини йўқ қилганини айтди. Бундан ташқари, у Москвани Украина атом электр станцияларига ҳужумлар тайёрлашда айблади.