Хитойда сўнгги икки йилда 20 мингдан ортиқ болалар боғчалари ёпилган

Хитойда болалар боғчалари ва мактабгача таълим олувчилар сони сезиларли даражада камайди. Бу ҳақда Tencent News хабар берди.

Хитой Таълим вазирлиги томонидан 10 октябрь куни эълон қилинган “2023 йилги таълимни ривожлантириш бўйича статистик ҳисобот”га кўра, 2023 йилда мамлакатда 274.400 та болалар боғчаси рўйхатга олинган бўлиб, ўтган йилга нисбатан 14.808 тага, яъни 5,12 фоизга камайган. Шунингдек, мактабгача таълим олувчилар сони 40,93 миллион нафарга етиб, ўтган йилга нисбатан 5,35 миллион болага ёки 11,55 фоизга камайган.

Tencent News агентлиги маълумотларига кўра, Хитойда болалар боғчалари ва мактабгача таълим олувчилар сонининг қисқариши нафақат 2023 йилда, балки ундан ҳам эртароқ бошланган.

"2022 йилги миллий таълимни ривожлантириш бўйича статистик ҳисобот" маълумотларига кўра, 2022 йилда Хитойда жами 289,200 та болалар боғчалари мавжуд бўлиб, ўтган йилга нисбатан 5,610 та болалар боғчалари, яъни 1,90 фоизга камайган. Мактабгача ёшдаги болалар сони 46,28 миллион нафарни ташкил этди, бу ўтган йилга нисбатан 1,78 миллион болага, яъни 3,70 фоизга камайди.

Сўнгги йилларда Хитойда туғилиш даражасининг пасайиши болалар боғчасига борадиган болалар сонининг кескин камайишига сабаб бўлганини маълум қилганди.