Трамп ниҳоят Зеленскийнинг қатъий сўровига розилик берди

АҚШ президенти Доналд Трамп Украина ҳудудида Patriot ракеталари ишлаб чиқарилишига ижозат берди. Бу ҳақда Украина етакчиси Владимир Зеленский маълум қилди.

«Аниқ келишувга эришдик. Президент Трамп мен билан сўнгги учрашувда “Ҳа, мен узил-кесил қарор қабул қилдим. Украинага Patriot ракеталарини ишлаб чиқариш учун лицензия берилади” деди. Жамоамиз Украинада Patriot ракеталарини ишлаб чиқаришни йўлга қўйиш бўйича ишларни давом эттирмоқда», — деган Зеленский.

Икки давлат раҳбари жорий ҳафта бошида БМТ Бош ассамблеяси мажлиси доирасида Ню-Йорк шаҳрида учрашган эди.

Patriot мажмуаси дунёда энг илғор ҳаво ҳужумидан мудофаа тизимларидан бири саналади.

Украина ҳукумати АҚШдан кўпдан буён ўз ҳудудида Patriot ракеталарини ишлаб чиқаришга рухсат беришини сўраб келади.

Зеленский фикрича, Украинага Patriot тизимлари учун ракеталар етказиб бериш “ўта зарур”.

Киев ҳукуматига кўра, Россия Украинага ҳар бир ҳужумда 30-40 та баллистик ракета ёғдирмоқда. Баллистик ракеталарни зарарсизлантиришда эса Patriot тизими муҳим ўрин тутади.

Август ойида Зеленский Россиянинг қиш мавсумидаги ҳужумларини қайтариш учун АҚШ захирасидаги Patriot ракеталарининг 5 фоизи талаб этилишини айтганди. Москва йўллаётган баллистик ракеталарнинг барчасини уриб тушириш учун эса АҚШ бисотидаги 10 фоиз Patriot ракеталари зарур бўлади.

Оқ уй томонидан Киевга Patriot ракеталари ишлаб чиқаришга рухсат берилиши Украина тезкор мудофаа имконига эга бўлишини англатмайди, албатта. Чунки бундай турдаги замонавий ракеталар ишлаб чиқаришни йўлга қўйиш учун ойлар, ҳатто йиллар кетиши мумкин. Аммо Вашингтон томонидан розилик берилишининг ўзи Киевнинг яна бир стратегик ютуғини англатади.

Аввал хабар берганимиздек, АҚШ Эронга қарши жорий йил 28 февралдан буён олиб бораётган уруши мобайнида узоқ масофага учувчи ракеталар, шунингдек, Patriot ҳаво ҳужумидан мудофаа тизимида истифода этиладиган ракеталарнинг салмоқли захирасини сарфлаб тугатди. Бу эса Қўшма Штатларнинг эҳтимолий ҳарбий зиддиятларга шайлигини савол остида қолдирмоқда.