Украина илк бор Россия ортидаги ҳудудга жанговор роботларни туширди

Украина зарба берувчи дронлари илк бор ер устида ҳаракатланувчи камикадзе роботларни Россия қўшинлари назоратидаги ҳудуд ичкарисига 10 километрдан ортиқ масофага етказди. Украина Қуролли кучлари 3-армия корпуси маълум қилишича, «Вивальди» деб номланган ушбу операция бундай тактикани қўллаш бўйича дунёдаги илк ҳолат бўлган.

Украина томони маълумотларига кўра, камералар билан жиҳозланган роботлар туширилганидан сўнг Россия позициялари бўйлаб мустақил ҳаракатланиб, нишонларни қидирган. 3-армия корпуси қўмондони Андрей Билецкий операциянинг иккинчи босқичида 800 дан ортиқ россиялик ҳарбий ҳалок бўлганини айтди.

Унинг таъкидлашича, ярадорлар ва асирларни ҳам ҳисобга олганда, Россия томонининг умумий йўқотишлари 3000 кишидан ошган. Бироқ бу рақамлар мустақил манбалар томонидан тасдиқланмаган.

Операцияда «Грифон» деб номланган роботлаштирилган тизимлардан фойдаланилган. Украина томонига кўра, роботлар Украина ҳарбийларидан олдин ҳаракатланиб, энг хавфли вазифаларни бажарган.

Билецкийнинг билдиришича, сўнгги ҳафталарда Украина кучлари 125 квадрат километрдан ортиқ ҳудудни назоратга қайтарган. Донецк вилоятининг Лиман ҳудудида Среднее, Дерилово ва Шандриголово аҳоли пунктлари ҳам озод қилингани айтилмоқда.