Хитой Ташқи ишлар вазирлиги матбуот котиби Хуа Чуньиннинг маълум қилишича, Пекин АҚШ Конгресси Вакиллар палатаси спикери Нэнси Пелосининг Тайванга ташрифи муносабати билан албатта барча зарур қарши чораларни кўради.
Бу ҳақда у брифингда жавоб берди.
“Пелоси Хитойнинг кескин норозилигига қарамай Тайванга ташриф буюрди. Хитой миллий суверенитет ва ҳудудий яхлитликни қатъий ҳимоя қилиш учун барча зарур қарши чораларни кўради”, — дея ТИВ вакилининг сўзларидан иқтибос келтирган ТАСС агентлиги.
Унинг сўзларига кўра, Пелосининг Тайпейга сафари Тайван бўғозидаги тинчлик ва барқарорликка путур етказади. Шунингдек, у АҚШ ва Тайван мустақиллигининг бошқа тарафдорлари Пекиннинг Америкага қарши чоралари ва санкциялари учун жавобгар бўлишини қўшимча қилди.