Хитой сунъий интеллект ёрдамида узоқ масофага ва баландликка учувчи дрон яратди

Хитойнинг сунъий интеллект билан жиҳозланган энг янги Rainbow-9 (Цайхун-9) учувчисиз учиш аппарати 10 минг км дан ортиқ масофани босиб ўтишга қодир. Бу ҳақда ТАСС хабар беради.

Давлат телерадиокомпанияси CCTV Шэньси провинциясидаги аэродромда парвоз синовлари чоғида Rainbow-9 тасвирини намойиш этди, деб хабар беради South China Morning Post (SCMP). Қурилма 20 соатдан ортиқ давом этган парвозни амалга оширди.

Ҳарбий таҳлилчи Сун Чжунпин нашрга айтишича, Rainbow-9 га сунъий интеллект тизимларини ўрнатиш "унинг жанговар самарадорлигини сезиларли даражада оширади". Унинг қайд этишича, Rainbow-9 бир вақтнинг ўзида бир нечта дронларни бошқариши мумкин. Бундан ташқари, қурилма бошқариладиган жанговар самолётлар билан биргаликда ишлашга қодир. "Rainbow-9 каби учувчисиз аппаратларнинг бошқариладиган қирувчи самолётлар билан бирга ишлаши мутлақо нормал ҳолат", - дея қўшимча қилди эксперт.

Аппарат 0,5 Мах дан 0,75 Мах гача тезликда учиб, 40 соатгача ҳавода туришга мўлжалланган. Бу унга 10 минг км дан ортиқ масофани босиб ўтиш имконини беради. SCMP таъкидлаганидек, Хитой аэрокосмик фан ва технология корпорацияси (CASC) томонидан ишлаб чиқилган Rainbow-9 сериядаги энг илғор дрон ҳисобланади. Унинг қанотлари кенглиги 24,8 метр бўлиб, 10 000 метрдан юқори баландликларда узоқ муддатли миссиялар учун етарлича кўтариш қобилиятини таъминлайди.