Венгриядаги ягона нефтни ишловчи компания Россия нефтидан бутунлай воз кечишга тайёр

Бу ҳақда Bloomberg хабар бермоқда.

Венгриянинг энг йирик нефт-газ компанияси МОL Россиядан эмас, бошқа манбалардан нефтнинг катта қисмини олиши мумкинлигини маълум қилди, дея хабар бермоқда агентлик.

Компания вакилларининг маълум қилишича, Хорватиядаги Аdria қувур линияси Украина орқали ўтувчи Россиянинг “Дружба” қувури тўхтатилган тақдирда етказиб берилаётган нефтнинг тахминан 80 фоизини алмаштира олади.

Бу баёнот Венгрия бош вазири Виктор Орбан ва АҚШ президенти Доналд Трамп учрашувидан аввал берилди. Аввалроқ, Трамп Россиянинг “Лукойл” ва “Роснефть” компанияларига қарши санкциялар жорий қилган эди.

Bloomberg агентлигининг қайд этишича, МОL компаниясининг бу баёноти Венгриянинг ҳозиргача “Россия нефтига муқобил йўқ” деган позициясидан чекинишини ва риторикадаги бурилишни англатади.