Венесуэла Трампнинг таҳдидларига жавобан танкерлар учун ҳарбий эскортларни жорий қилмоқда

Венесуэла ҳукумати АҚШ президенти Дональд Трампнинг таҳдидларига жавобан танкерлар учун денгиз эскортини жорий қилди.

Бу ҳақда The New York Times (NYT) нашри хабар берди.

Қайд этилишича, АҚШ президенти Венесуэла билан бизнес юритувчи санкцияланган танкерларни блокировка қилишини эълон қилганидан сўнг, нефть қўшимча маҳсулотларни олиб кетаётган бир қанча кемалар денгиз кучлари кузатуви остида мамлакат шарқий қирғоқларидан жўнаб кетган.

Нашрнинг ёзишича, Хосе портидан нефть маҳсулотларини олиб кетаётган кемалар Осиё бозорларига йўл олган. АҚШ расмийсининг таъкидлашича, Оқ уй эскорт ҳақида билиб олган ва турли вариантларни кўриб чиқмоқда. Ушбу танкерлар АҚШ санкцияларига дучор бўлган кемалар рўйхатида бўлганми ёки йўқлиги номаълум.

Эслатиб ўтамиз, аввалроқ журналист Такер Карлсон АҚШ президенти Дональд Трамп 17 декабр, чоршанба куни маҳаллий вақт билан 21:00га режалаштирилган Овал кабинетдаги нутқи чоғида Венесуэлага уруш эълон қилишини маълум қилган эди.

Бунгача сиёсатчи Венесуэладан АҚШга мулкини қайтаришни талаб қилган ва республика Жанубий Америка тарихида йиғилган энг катта армада билан тўлиқ ўралганлигини таъкидлаган.