Венесуэла инқирози Путинни яна бир бор шарманда қилди — Politico

Politico нашри таҳлилига кўра, АҚШ томонидан Николас Мадурони тезкор равишда қўлга олиниши Россиянинг ўз иттифоқчиларини ҳимоя қилиш борасидаги имкониятлари чекланганини яна бир бор очиқ-ойдин кўрсатди. Москва расман Венесуэла ҳукуматини қўллаб-қувватлаб келганига қарамасдан, инқироз чоғида ҳеч қандай таъсирчан чора кўра олмади.

Нашр қайд этишича, ушбу воқеа Кремлнинг ўзини глобал қутб сифатида кўрсатиш, Ғарбга муқобил «кўпқутбли дунё» яратиш ҳақидаги даъволарини жиддий шубҳа остига қўйди. Россия Венесуэла, Сурия ва бошқа давлатлар билан стратегик иттифоқчилик муносабатларини намойиш этса-да, реал вазиятда бундай шерикларини ҳимоя қилиш ёки қўллаб-қувватлаш учун етарли сиёсий ва ҳарбий ресурсларга эга эмаслиги кўринди.

Шу билан бирга, Politico АҚШнинг бу ҳаракати нафақат Мадуро режимига, балки Кремлга ҳам аниқ сиёсий сигнал бўлганини таъкидлайди. Хусусан, Вашингтон Москвага унинг таъсир доираси чекланганини ва глобал жараёнларга таъсир кўрсатиш қобилияти камайиб бораётганини намоён этган.

Таҳлилчиларга кўра, Венесуэладаги воқеалар Россия ташқи сиёсатининг заиф нуқталарини очиб бериб, Путин ҳукумати учун навбатдаги имидж йўқотишга айланди. Кремльнинг кўпқутбли дунё ҳақидаги риторикаси эса амалий воқелик билан мос келмаётгани яна бир бор кўзга ташланди.