Лукашенко қўшни давлатларга «Орешник» билан таҳдид қилди

Беларусь президенти Александр Лукашенко Украина томонининг Беларусда жойлаштирилган «Орешник» мажмуасини НАТО учун қонуний нишон сифатида тан олиш зарурлиги ҳақидаги баёнотларини «чиндан ҳам аҳмоқлик» деб атади. Бу ҳақда давлат ахборот агентлиги БЕЛТА хабар берди.

Александр Лукашенко таъкидлашича, Минск Вильнюс, Варшава ёки Киевга қарши превентив зарбалар беришни режалаштирмаяпти, аммо ўз суверенитетини ҳимоя қилишга тайёр. Президентнинг айтишича, стратегик қуроллар қўлланишининг олдини олиш учун қўшни давлатлар ҳарбий босимни тўхтатиши керак.

💬 «‘Орешник’ портлаб кетмаслиги учун бизга тегманглар. На Украина томонидан, на Польша, на Литва, на Латвия томонидан», — деди Лукашенко.

Унинг қўшимча қилишича, барча баҳсли масалаларни бошқа форматда ҳал қилиш керак.

Президент таъкидлашича, агар мамлакат ҳудудидаги объектлар ҳужум нишонига айланса, Беларус Қуролли кучлари бефарқ қолмайди. Лукашенко 70 ва 200 километр масофадаги нишонларни ура оладиган тизимлар мавжудлигини ҳам эслатди.

💬 «Агар улар ‘Орешник’ни қонуний нишон деб ҳисоблашса — марҳамат. Лекин мен уларга тил билан жанг қилишмасликни маслаҳат бераман. Бизда жавоб беришга воситалар бор», — деди республика раҳбари.

Шунингдек, Лукашенко тизимнинг тактик хусусиятларига ҳам тўхталиб, «Орешник» мобил қурол эканини таъкидлади. Унинг айтишича, марш­рутларда ўнлаб сохта нишонлар чиқарилади, бу эса мажмуани нейтраллаштиришни жуда қийинлаштиради.

Бу тизимларни жойлаштириш бўйича келишув Россия ва Беларусь ўртасида 2024 йил декабрида эришилган. 2025 йил 17 декабрдан бошлаб мажмуа Беларусда расман жанговар навбатчиликка киришган.

Аввалроқ Украина президенти Владимир Зеленский "НАТО"ни «Орешник»ни қонуний нишон сифатида кўриб чиқишга чақириб, беларус раҳбариятини хатога йўл қўйганликда айблаган эди. Унинг таъкидлашича, Украина Беларус ҳудудидан келаётган таҳдидни мустақил равишда баҳолайди.

💬 «Лукашенко катта хато қилмоқда. Ҳамма улар ҳозир кўпроқ шоу қилаётганини кўряпти», — деган эди Украина президенти февралдаги баёнотида.