Венесуэла ҳукумати АҚШни оғохлантирмоқда: «Бизнинг қирғоқларимиздан узоқроқ туринг»

Венесуэла вице-президенти ва нефть вазири Делси Родригес АҚШга қарши кескин баёнот билан чиқиб, Вашингтонни мамлакат ички ишларига аралашмасликка ва Венесуэла ҳудудидан узоқроқ туришга чақирди.

Карабобо штатида сўзлаган Родригес Америка ҳарбий кемаларининг Кариб денгизи томон йўналтирилишига ишора қилиб, АҚШ маъмуриятини душманона сиёсат юритаётганликда айблади.

— Ички муаммоларингизни ҳал қилинг ва бизга яқинлашманг. Агар АҚШ мамлакатимизга ҳужум қилишга журъат этса, Венесуэла улар учун энг даҳшатли орзу-умидсизликка айланади, — деди у.

Родригеснинг таъкидлашича, АҚШ Венесуэланинг бой энергия ресурсларини қўлга киритишни мақсад қилган:
— Улар империализм ва экспансионизмга асосланган давлат. Табиий бойликлардан фойдаланиш учун бошқа мамлакатларни мустамлака деб биладилар, ўзлари эса ижтимоий ва иқтисодий инқироз ботқоғида.

Вице-президент Вашингтоннинг Венесуэлани «наркотеррорчи давлат» деб аташини рад этди ва буни «уйатсиз ёлғон» деб баҳолади:
— Симон Боливар ва Уго Чавес халқи гиёҳванд моддалар савдосида айбланиши мумкин эмас. Венесуэла бутун дунё халқлари учун тинчлик ва умид мамлакати, — деди у.

АҚШ ва Венесуэла ўртасидаги кескинлик

Маълумки, АҚШ президенти Дональд Трамп август ойи бошида Лотин Америкаси наркотик картелларига қарши қўшин ишлатиш орқали курашиш ҳақида фармон имзолаган эди.

8 август куни Вашингтон Венесуэла президенти Николас Мадуро ҳақида маълумот берганларга мукофот миқдорини 25 миллион доллардан 50 миллионга оширди.

АҚШ Молия вазирлиги хабарига кўра, Мадуро ўн йилдан ортиқ вақт давомида «Cartel de los Soles» деб аталган «махсус белгиланган глобал террорчи тузилма»ни бошқарган.

Оқ уй кўрсатмасига биноан Кариб денгизи минтақасига сув ости кемаси ва еттита ҳарбий кема жўнатилган.

Бунга жавобан, 18 август куни Мадуро Венесуэланинг денгизи, осмони ва ерини ўзи ҳимоя қилишини айтди:
— Ҳеч қандай империя Венесуэла ва Жанубий Американинг муқаддас чегараларини бузолмайди, — деди давлат раҳбари.