Вашингтоннинг рухсатисиз ҳеч бир кема Ҳормуздан ўтмайди

АҚШ ҳарбий котиби Пит Хегсет Қўшма Штатларнинг Ҳормуз бўғозини амалда назорат қилишини ва денгиз блокадасини кенгайтиришини эълон қилди.

Хегсет ҳеч бир кема АҚШ денгиз флотининг рухсатисиз бўғоздан ўтолмаслигини айтди.

Хегсет ҳозирда фақат Эронга тегишли бўлмаган кемаларга транзит қилишга рухсат берилганини, уларнинг баъзилари аллақачон бўғоздан, жумладан, тунда ўтганини таъкидлади. Унинг қўшимча қилишича, блокада кучайтирилмоқда ва яқин кунларда яна бир авиаташувчи кема операцияга қўшилади.

"Бизнинг блокадамиз кенгайиб, глобал тус олмоқда. Айнан шу ҳафта биз Ҳинд-Тинч океани минтақасида Эроннинг иккита "соя флоти" кемасини қўлга олдик. Биз бундай ҳаракатларни давом эттирамиз", деб таъкидлади у Пентагон брифингида.

Унинг қўшимча қилишича, АҚШ душманларига йўлларни ёпишда ва ўз манфаатларини ҳимоя қилишда давом этиш ниятида. "Ҳеч ким Ҳормуз бўғозини тарк этиб, АҚШ денгиз флотининг рухсатисиз дунёнинг исталган нуқтасига бора олмайди", деди у.

Хегсет шунингдек, Эрон расмийларини кескин танқид қилиб, уларни вазиятни беқарорлаштиришда ва фуқаролик кемаларига ҳужум қилишда айблади. Унинг таъкидлашича, Эрон кучлари денгиз миналарини қўйиб, АҚШ ёки Исроил билан алоқаси бўлмаган тасодифий кемаларга қарата ўқ узмоқда.

Теҳронга мурожаат қилиб, вазир блокада кучайтирилишини ва вазият устидан АҚШ назорати сақланиб қолишини айтди.