Ўзбекистон Т-64 танкининг янги модификациясини тақдим этди

Тошкентдаги мудофаа технологиялари фестивалида Ўзбекистон Т-64 танкини модернизация қилиш лойиҳасини тақдим этди, деб ёзади Miltarnyi портали.

Модернизациядан ўтган танк қўшимча зирҳ билан жиҳозланган, шунингдек, янги двигател ўрнатилган. Танк минораси эса ихтисослаштирилган бўлинмага эга бўлиши мумкин — бу бўлинмага кондиционер тизими ёки қўшимча электрон ускуналарни жойлаштириш мумкин.

Miltarnyi нашрининг таъкидлашича, модернизация қилинган танкда тутунли тўсиқлар ҳосил қилиш учун мўлжалланган миномётлар, шунингдек, NSVT (Никитин-Соколов-Волков Танки) туридаги пулемёт ўрнатилмаган.

Бунгача Ўзбекистон Т-64 танкининг модернизацияланган кўринишини — Т-64МВ деб номланган моделни намойиш қилган эди. Ушбу модел кучлироқ двигател ва янги радиоалоқа воситаси билан жиҳозланган.

2022-йилда Ўзбекистон армияси ихтиёрида 100 дан ортиқ Т-64 ҳамда 100 дан зиёд турли модификациядаги Т-72 танклари мавжуд бўлган.

Аввалроқ Kursiv Uzbekistan нашри хабар беришича, Ўзбекистон БААда ўтказилган кўргазмада ҳам ҳарбий техникасини намойиш қилган эди.