Ўзбекистон Республикаси рақамли криминалистика соҳасида ўз мавқеини мустаҳкамламоқда

Ўзбекистон Республикаси Ҳуқуқни муҳофаза қилиш академияси негизидаги Рақамли криминалистика илмий-тадқиқот институтининг ташкил этилиши халқаро даражада эътироф этилмоқда. Турли мамлакатларнинг соҳа экспертлари бу ташаббусни юқори баҳоламоқда.

Иван Стрельцов, Россия Тергов қўмитаси Криминалистика бош бошқармаси раҳбари ўринбосари:

– Рақамли криминалистика илмий-тадқиқот институтининг ташкил этилиши Ўзбекистон Республикаси ҳуқуқни муҳофаза қилиш фаолияти соҳасида муҳим қадам бўлди. Ахборот технологияларининг жадал ривожланиши ва уларнинг ноқонуний мақсадларда ишлатилиши шароитида, ушбу институт кибержиноятчиликка қарши курашнинг инновацион усулларини ишлаб чиқиш ва жорий этишда муҳим ўрин тутади. Сизнинг тадқиқот ва ишланмаларингиз нафақат Ўзбекистонда, балки халқаро миқёсда ҳам рақамли криминалистиканинг ривожланишига муҳим ҳисса қўшади.

Юрий Каменецкий, Беларусь Республикаси Тергов қўмитаси малака ошириш институти директори:

– Ўзбекистон Республикасининг рақамли криминалистикани ривожлантиришга қаратилган стратегик эътибори юқори баҳога лойиқ. Ушбу соҳадаги ихтисослаштирилган институтнинг ташкил этилиши рақамли даврда миллий хавфсизликни таъминлашга комплекс ёндашувдан далолат беради. Ишончим комилки, институтнинг илмий тадқиқотлари ва амалий ишланмалари натижалари иқтисодиёт, ишлаб чиқариш ва жамият ҳаётининг бошқа асосий соҳаларини кибертаҳдидлардан ҳимоя қилиш учун ишончли асос бўлиб хизмат қилади.

Мухитдин Ўздемир, Туркия Адлия академияси президенти:

– Рақамли криминалистика илмий-тадқиқот институтининг ташкил этилиши замонавий давр талабларига ўз вақтида берилган жавобдир. Глобал рақамлаштириш ва кибержиноятчилик ўсиши шароитида кенг кўламли қўшма тадқиқотлар ўтказиш биринчи даражали аҳамият касб этмоқда. Туркия Адлия академияси рақамли криминалистика соҳасида илмий тадқиқотлар ва тажриба алмашиш бўйича фаол ҳамкорликка тайёр эканини билдиради.

Сами Рюханен, ЕХҲТ полиция фаолияти стратегик масалалари бўлими бошлиғи:

– Европада хавфсизлик ва ҳамкорлик ташкилоти (ЕХҲТ) Ўзбекистонда Рақамли криминалистика илмий-тадқиқот институтининг ташкил этилишини қутлайди. Ушбу ташаббус ЕХҲТнинг халқаро кибержиноятчиликка қарши кураш соҳасидаги устувор йўналишларига тўлиқ мос келади. Биз ушбу институтни Марказий Осиёда рақамли хавфсизлик масалалари бўйича минтақавий ҳамкорликни ривожлантириш учун потенциал платформа сифатида кўриб чиқамиз ва кибержиноятчиликка қарши кураш салоҳиятини ошириш бўйича қўшма дастурларни амалга оширишда ҳар томонлама ёрдам кўрсатишга тайёрмиз.

Ўзбекистон Республикаси Рақамли криминалистика илмий-тадқиқот институтини ташкил этиш орқали яна бир бор кибержиноятчиликдан холи жамият қуришга содиқлигини намойиш этди.

Бу ерда инновацион технологиялар, шаффофлик ва самарадорлик ҳуқуқни муҳофаза қилиш фаолиятининг тамал тоши ҳисобланади. Рақамли криминалистика институтининг ташкил этилиши рақамли жиноятларга қарши курашда бошқа мамлакатлар учун намуна бўлиб хизмат қилади.